日前世界盃外圍賽亞洲賽十二強賽响多哈舉行,中國國家隊輸畀日本隊腳,國家隊一輸自然惹嚟內地球迷排山倒海嘅負皮評價,不過唔少傳媒疑似好樂觀話依家國家隊多咗幾個入籍兵,質素達世界級態度又夠晒專業,咁又真係好樂觀喎!

响足球世界球員轉國籍代表其他國家出賽並唔係乜嘢特別事,不過一直以來國足都係無入籍球員,咁係幾時開始出現呢?就係2019年喇!呢個政策係同一個人有關,佢就係前國足主教練納比。呢位世界級教頭執教國足時,就主張引入歸化球員代表國足出場,而中國足協就打破慣例引入歸化球員。簡單嚟講歸化球員可以分為兩類,第一類就係血緣上同中國有關,即父母或祖輩係中國人,好似現時李可、侯永永、蔣光太等。另一類就係無中國人血統嘅入籍球員,好似高拉特、艾克森、阿蘭、洛國富等原本係巴西籍嘅球員,都係响中超打滾多年後入籍中國,成為國足一員。

不過無論係有中國血統嘅入籍兵,抑或無中國血統嘅入籍兵,入籍中國都要放棄原本國籍,因為中華人民共和國國籍法係唔承認中國公民有雙重國籍。

原圖:南方日報