近日位於深水埗欽州街51至53號戰前唐樓就被圍上棚架，呢個舉動就令到附近嘅居民、甚至係保育團體都相當關注，咁到底呢座建築物係何方神聖會引嚟咁多人關注呢？阿史今次就同大家介紹下啦！

呢座興建於1932年嘅欽州街戰前唐樓其實早年就已經被評為一級歷史建築物，整體樓高四層，以往就係採取下鋪上居嘅形式，而目前建築物嘅底層都仲有商戶經營生意。咁到底呢座建築物有咩特色呢？雖然依家搭上棚架之後大家可能睇唔到，但其實每戶嘅騎樓外牆都會有兩條以愛奧尼柱式設計嘅柱，外牆仲有好多條羅馬式石柱，建築物頂部仲會有三角楣飾，真係同時有齊古希臘、羅馬建築元素。

據了解，呢次圍上棚架就唔係要清拆建築，只係進行定期維修保養，但係唔少市民同埋保育團體就擔心，工程可能會對樓宇結構有破壞，而且承建商未必識得保育呢類古老建築，阿史都希望最終呢座戰前唐樓可以「修舊如舊」啊！

原圖嚟自網絡