早幾日就同史友們講到有「外星文明」之稱嘅三星堆考古遺址當中嘅3號祭祀坑，喺經過四個月時間嘅發掘之後，終於就發現咗一顆同1986年喺2號坑發現嘅神樹極為相似嘅神樹。但其實呢次嘅發掘又點止得一樣？阿史今次就繼續同史友們分享一下啦！

喺1986年嘅發掘之後，時隔36年三星堆遺址就再次展開考古發掘工作，喺3月嘅時候其實考古隊曾經就公布過階段性嘅成果，咁嚟到9月到底又有咩新發現呢？經過半年嘅挖掘，考古隊就喺 3號坑同埋4號坑搵到唔少重要嘅器物：喺3號坑當中，考古隊就搵到各類器物殘件、標本共729件，當中就有銅器293件、玉器45件、象牙100根、金器7件等等，而最為驚世嘅就係有一件「獸面鳳鳥紋玉方座」。呢件文物整體係以青灰色玉料切割而成，側面線刻獸面紋、鳳鳥紋，呢種設計被認為係前所未見。

至於4號坑就已經完成所有遺物提取，一共就發現到完整器79件、殘件1073件，並且經過測年發現當中文物埋藏年代都係屬於商代晚期，而3號坑嘅年份又同2號坑相近。

直到目前為止，考古發掘嘅工作已經進行咗大半，亦都出土同埋修復咗唔少國寶級文物，就好似青銅跪坐扭頭人像、金面具、神樹紋玉琮等等。到底三星堆仲會有咩發現，阿史真係好期待啊！

原圖嚟自網絡