「馬桶」原本叫做「虎子」？

唔知史友們心中會唔會一直都有呢個問題，就係到底點解「馬桶」要叫做「馬桶」，到底係咪同馬有關係呢？要解答呢個疑問，就要由兩個歷史故事講起。

喺《左傳》就有一段咁樣嘅記載，喺春秋時期晉國君主晉景公喺食完一輪美食之後就覺得肚脹，需要到廁所排解一下。之不過岩岩食飽飯嘅佢太唔小心，一唔為意就跌咗落糞坑淹死。亦都因為呢件事，令到當時嘅人開始思考點樣令到廁所呢個地方比較安全。而另一個歷史故事就係同漢高祖劉邦有關，佢喺一次上朝嘅時候突然想去廁所，但又為咗可以節省時間，於是就要求其中一位官員將自己嘅帽交畀佢，結果佢一轉身就將方便咗喺頂帽入面，而呢一幕亦都畀朝上文武百官睇到。

為咗解決達官貴人如廁嘅需要，當時就有人發明咗名為「虎子」嘅如廁工具，咁點解叫做「虎子」呢？原來喺西漢嘅時候有位名為李廣嘅將軍射殺咗一隻卧虎，佢就命人將呢隻卧虎嘅形態以銅器打造，如果就變成銅質溺具，並且以「虎子」命名。而後來去到唐朝，因為唐高祖李淵父親叫做李虎，為咗避開殺身之禍，民間就只好將「虎子」稱為「馬子」，而呢種溺具亦都由原來壺狀演變成木桶，所以又叫做「馬桶」。