尋日就同史友們回顧返911事件，呢件造成三千幾人傷亡嘅恐襲係唔少美國人心目中嘅傷痛，而時任美國總統喬治布殊得知呢個消息後，仲因為控制唔到自己嘅憤怒而需要喺活動當中即時離去。咁到底喺呢場911事件過後，美國又做過咩事應對呢

答案就係發動2001年嘅阿富汗戰爭喇！如果史友們有印象，應該都記得近排就係因為美國軍隊撤軍，阿富汗嘅政府軍節節敗退，塔利班最後就成功重掌政權。呢場戰爭就係2001年10月7日開始，由美國為首嘅聯軍向阿富汗蓋達組織同埋塔利班所發動嘅一場打咗接近二十年嘅戰爭。發動呢場戰爭最初嘅一個目的就係逮捕拉登同埋其他阿蓋達組織成員，並且對塔利班作出懲罰，所以阿富汗戰爭一都都被視為係美國對九一一事件嘅報復行動。

喺戰爭未開始之前，美國政府曾經向塔利班政府發出最後通諜，要求佢咃交出阿蓋達組織高層成員、釋放所有被監禁嘅外國人同埋畀美軍檢查所有訓練營，但當時塔利班政府冇答應美國嘅要求，只係提出可以將拉登送到中立國接受起訴。

結果當時美國總統喬治布殊拒絕呢啲回應，喺2001年10月7日，美國同英國就組成聯軍入到阿富汗境內，並且同北方聯盟接觸，達成協議合作推翻塔利班政權。結果美國雖然好快攻陷喀布爾，但由於阿富汗地形嘅問題，長年嘅阿富汗內戰就咁展開，直到2021年8月30日先至宣告撤軍。

原圖嚟自網絡