柴灣有間清真寺居民都未必知

之前阿史介紹過赤柱監獄有間清真寺，其實阿史心中仲有一間清真寺想介紹下，就係柴灣嘅清真寺喇！

可能家住柴灣嘅史友都未必知個區有間清真寺，咁係因為呢間寺個位置都相當偏僻，係响哥連臣山道嘅下邊，位置大概係西灣墳場下低左近。呢間清真寺係响1963年建成，出現原因係因為政府响五十世代收返何文田嘅回教墳場，於是就响柴灣哥連臣角個度興建一個回教墳場代替，而呢間清真寺就因為呢個墳場而出現。呢間清真寺同其他清真寺相似，禮拜殿之上有個穹頂，而呢間清真寺亦成為咗住响柴灣同東區穆斯林禮拜嘅地方。

至於點解阿史想介紹呢間清真寺呢？係因為阿史細個有一段長時間住响附近嘅屋邨，望出單位外就見到哥連臣角墳場同呢間清真寺，以及附近一個儲水庫，以前一直唔知呢幢响山中嘅建築物到係乜東東。