今年香港運動員真係勁！香港網球新星黃澤林周六响2021美國網球公開賽青年組賽事男雙決賽，夥同法國拍檔Max Westphal以盤數2：1擊敗對手，贏得冠軍。一直以來華人男網球員贏得大賽冠軍唔係成日見，對香港人上一個熟悉嘅名字可能要數到張德培。
張德培係美籍華裔網球手，响美國出世，被公認為網球史上最佳亞裔及華裔男子選手。張德培可以話係少年成名，15歲已經贏得美國全國少年網球錦標賽冠軍，而佢最令人難忘嘅，就係响17歲之齡贏得法國公開賽冠軍，响決賽對住名將艾特堡發揮高水平同超好嘅比賽心態，到今時今日仍然有唔少人記得。而張德培响曾經最高嘅世界排名，係上到去第二位。
由於佢係華裔選手，所以响九十年代個陣佢响亞洲區內好受歡迎，特別係响香港。記得香港網球公開賽基本上都會請佢嚟打，即使响佢球員生涯晚期成績唔太好個陣，佢仍然獲邀參賽，因為佢响香港有一定叫座力。仲有就係佢都幫啲商品賣廣告，記得有益力加，仲有「頭皮no way」個隻洗頭水，唔知史友們仲記唔記得呢？
原圖：xinhua