三峽縴夫哥哥岸上走

話說最近留意到大台有套《無窮之路》，見到內地好多唔同嘅窮鄉僻壤，啲鄉民點解擺脫貧窮。見到呢套嘢，阿史就諗起以前三峽嘅一班縴夫。

縴夫其實就係昔日湖北巴東神農溪一班拉船嘅船工，據了解响以前湖北巴東縣城到沿渡河鎮，中間有無數高山，陸路不通，神農溪就成呢個地區內外運輸貨品嘅最主要交通線。但交通線有上有落，所以就需要靠人力响岸邊拉動神農溪上嘅船，縴夫就係咁樣出現咗。唔少人對縴夫嘅認識，可能就係覺得一班無著衫褲嘅男人响岸邊拉船，其實佢哋唔著衫係有原因。最大原因就係窮，如果著住衫褲拉船就會好快報銷，唔著好過。其實仲有一個原因就係拉船過程中縴夫要上水落水，如果著住衫就好易病同磨損身體，所以唔著仲方便。

講到縴夫，阿史就不得不提阿姐汪明荃，因為佢唔止一次獻唱過《縴夫的愛》，佢唱個句「小妹妹我坐船頭」硬係好似唱緊第二啲字咁，有興趣嘅史友不妨去youtube欣賞下。