繼續同史友們介紹內地近排嘅一啲考古發掘工作,近排喺山西省北魏都城平成所在地,就有考古團隊發掘緊一個北魏墓群,喺發掘過程當中佢哋就搵到一啲好特別嘅文物,阿史今次就同大家介紹下啦!

其實早喺2017年,大同市考古研究所就已經因為基本建設嘅工程而對一處北魏墓群進行搶救性發掘,一共就搵到北魏墓葬44座,而當中就有一座墓係好特別,唔單止紀年明確,就連文物內涵豐富。呢個墓嘅主人名為「賈寶」,墓入面就有各式各類嘅隨葬品,但當中就以木質武士俑、鎮墓獸同埋彩繪陶器最為特別!

雖然以往都有喺北魏墓中發現過武士俑、鎮墓獸,但講到係木質嘅就真係第一次發現,而木質武士俑有2件,武士俑頭戴頭盔,面上粗眉彎曲,雙目圓睜,尖鼻高聳仲蓄「八」字鬍,表面仲有塗紅彩;木鎮墓獸就只有一件,人面獸身同樣都係彩繪。

有啲咁精緻嘅陪葬品,自然就令人想去了解到底墓主係邊個。雖然大家都知道墓主名為「賈寶」,但呢個名就冇出現喺《魏書》當中,考古團隊就只係知道武威賈氏喺魏晉南北朝時期係涼州名門望族,賈寶可能就係其中一份子。

原圖嚟自網絡