無論係奧運定還是全運會，大家睇到嘅比賽項目都總係離唔開游泳、射箭、羽毛球、籃球等等，充其量全運會就比奧運多咗一個武術嘅項目。但唔知史友們又有冇諗過，其實早年嘅全運會係有唔少特色嘅比賽項目，就好似無線電收發報、飛機跳傘等等都係比賽項目之一！到底當中有咩歷史背景呢？阿史今次就同大家介紹下啦！

要介紹呢啲比賽項目點解會出現，就要由全運會嘅歷史講起先。喺1950年代末，當時正係中華人民共和國成立嘅十周年，喺「發展體育運動，增強人民體質」口號之下，第一屆全運會就喺1959年9月13日嘅北京開幕。雖然全運會嘅性質係一個運動會，但喺當時國內國外嘅大環境之下，對當時人民嚟講「鍛煉身體、保衛祖國」先至係最大嘅宗旨。受到呢種精神嘅影響，全運會早年就有唔少同軍事相關嘅項目加入其中，就好似無線電收發報、飛機跳傘、航空模型、水上摩托艇等軍事項目。

作為當時中國最大規模嘅運動會，參賽嘅主要係以大學生、勞動模範、戰鬥英雄為主，而呢批人物唔少後來都成為國家棟樑，所以全運會真係一啲都唔簡單！

原圖嚟自網絡