尋晚就係第14屆全運會喺西安奧體中心體育場舉行開幕禮嘅大日子,隨住文禮展演會奏起序曲、田徑場大型火炬被點起,第14屆全運會亦都正式開幕。可能唔少史友心目中都有個疑問,就係點解明明全運會岩岩先開幕,但部分賽事就已經有金牌出現呢?今次阿史就同大家介紹下啦!

作為全國水平最高、規模最大嘅綜合性運動會,全運會喺比賽項目上就設有34個大項、47個分項、387個小項,單單係場館就已經要用到超過一百個,面對咁多人數嘅運動員同埋賽程,比賽就自然需要提早進行以減低場地嘅壓力。

其實喺最近三十幾年嚟,每屆全運會都會有賽事需要提前開賽,「先期項目」就已經成為全運會嘅慣例,而按照今屆全運會賽程,好似跳水、籃球、排球同埋武術等比賽都已經喺開幕式前決出金牌。雖然係咁,但今屆全運會仲有好多精彩賽事仲未上演,阿史都真係相當期待我國運動員出色嘅表現!

原圖嚟自網絡