以往阿史都同唔少史友介紹世界各地嘅考古消息,而發現呢啲古物嘅好多時候都係專業嘅考古團隊。但唔知史友們又有冇諗過,其實學童嘅考古夏令營都可以有驚人嘅考古發現架!

其實呢件事係發生喺2006年嘅1月,當時喺紐西蘭北島懷卡托 (Waikato)就有一班學生同埋考古學家Chris Templer進行考古夏令營,希望可以喺當地搵到化石。點解要係紐西蘭北島呢?原來紐西蘭一直都係大型鳥類棲息地,過往出土過多種高度達到成人嘅史前巨型企鵝。而據最新刊於《古脊椎動物學雜誌》研究則公布,原來當年呢班學童喺準備離開考察熱門地點 Kawhia 港口之前,有眼利嘅小朋友就發現岸邊砂岩有唔尋常嘅化石痕跡。雖然呢班小朋友當時冇即時發掘,但事隔一個月之後,考古學家就同呢班小朋友舊地重遊並且帶齊工具,用咗一日時間起出呢塊化石。

化石其後就送到紐西蘭梅西大學、布魯斯博物館進行分析同埋研究,結果呢塊迄今最完整古代巨型企鵝化石就被證實係2,730-3,460 萬年前嘅化石,而佢嘅品種就係類似於其他凱魯庫企鵝屬 (Kairuku) 成員。由於呢種巨型長腿企鵝腳趾到喙尖可以長達 1.6 米,所以就直頭以毛利語「長腿 (waewaeroa) 」命名為K. waewaeroa。

原圖嚟自網絡