對香港嚟講，當年嘅今日係相當重要嘅一個日子，事關時任英國首相戴卓爾夫人以英國首相身份首次訪華。喺呢次行程當中，佢最主要嘅目的就係同鄧小平就香港前途問題展開談判。

喺訪華過程當中，戴卓爾夫人先係參觀中央美術學院，並且得到院校學生贈送一幅國畫，而好戲在後頭，佢就需要同鄧小平為香港前途問題展開談判。喺談判開初，其實鄧小平就已經明確表明可以用「一個國家，兩種制度（一國兩制）」嘅方案對香港恢復行便主權，而關於香港主權問題，佢更加係嚴正表示「中國在這個問題上沒有迴轉餘地。」

就算戴卓爾夫人開初態度幾咁強硬都好，甚至揚言：「如果中國收回香港，就會給香港帶來災難性的影響。要想繼續維持香港的繁榮，就必須繼續由英國來管理她。」但鄧小平聽到呢番話並冇被嚇倒，反而仲回應「如果不收回，就意味着中國政府是晚清政府，中國領導人是李鴻章！」、「如果說宣布要收回香港就像夫人說的『帶來災難性的影響』，那我們要勇敢地面對這個災難，作出決策。」

喺完結呢番對話之後，或者係被鄧小平強硬嘅態度嚇親，戴卓爾夫人離開人民大會堂步落石階果陣失足向前仆，亦都係後來舉世聞名嘅「世紀一仆」。喺呢次談判完結之後，雙方最後都係達成共識，其後展開22輪談判，最終喺1984年12月19日正式簽署《中英聯合聲明》，中國喺1997年7月1日起對香港島、界限街以南的九龍半島、新界等土地重新行使主權。  

原圖嚟自網絡