中英兩國草簽《中英聯合聲明》 香港問題談判圓滿結束

早幾日阿史就同大家介紹到時任英國首相戴卓爾夫人以英國首相身份首次訪華，並且就香港前途問題同鄧小平展開談判。喺呢次談判當中，戴卓爾夫人見識到中方強硬嘅態度同埋決心，亦都認知到中央必定會對香港恢復行使主權，於是喺談判過後嘅兩年間就展開咗長達22次嘅會議。而喺當年今日，呢次漫長嘅談判終於有結果喇！

1984年9月26日，中英兩國政府喺北京草簽《中英聯合聲明》以及三個附件，當時中方就由中國副外長周南作為代表，同英國駐華大使伊文思喺北京人民大會堂進行草簽儀式。呢次簽訂亦都意味住兩國同意，喺1997年7月1日起中國對香港恢復行使主權，香港就會成為香港特別行政區，生活方式不變，以及保持自由港、獨立關稅區同國際金融中心地位等12條條文。

值得一提，喺同日，英國政府就發表《中英關於香港前途的協議草案的白皮書》，當中就表明英國政府有信心呢份協議可以令香港喺1997年成為中國嘅特別行政區之後，繼續保持穩定、繁榮，並極力推薦俾香港人同埋英國國會。長達多年嘅香港前途問題談判，隨住《中英聯合聲明》草簽而圓滿結束。