尋日華為公司首席財務官孟晚舟就同美國司法部達成延後起訴協議，孟晚舟即時獲釋返回中國。呢個消息傳出之後全國上下都相當喜悅同激動，唔少民眾仲自發去到機場接機，喺見到孟晚舟嘅一刻，接機嘅民眾甚至仲唱起《歌唱祖國》，歌聲一度令到唔少人「破防」流淚。到底《歌唱祖國》係一首咩歌曲，可以令到咁多國民感動呢？阿史今次就同大家介紹下啦！
《義勇軍進行曲》係第一國歌呢件事係眾所周知，至於《歌唱祖國》其實就被公認為第二國歌！《歌唱祖國》據指係由王莘喺1950年嘅國慶期間作曲、填詞而成，呢首歌曲更喺1951年9月12日由周恩來總理親自簽發了中央人民政府令。咁多年嚟都喺唔少國務活動、外事活活以及檢閱活動當中被用作禮儀曲、甚至係開場歌曲，地位真係有返咁上下！
呢首凝結愛國之聲、人民之心、民族之魂嘅歌曲歷年嚟都有唔少版本，咁到底佢係點樣被創作出嚟呢？原來呢首歌創作喺1950年9月，當時正係新中國成立一週年，王莘本來只係由天津去到北京購買樂器，但過程中見住天安門廣場五星紅旗飄揚、鮮花如海嘅動人景象，畫面令佢相當感動。於是就喺回程嘅列車上，一氣呵成咁創作出呢首歌。據講歌詞頭四句，係王莘第一時間脫口而出就諗到「五星紅旗迎風飄揚 勝利歌聲多麼響亮 歌唱我們親愛的祖國 從今走向繁榮富強」，從此以後就成為新中國歷代人奮進團結嘅「第二國歌」喇！
原圖嚟自網絡