一宗海上反走私行動，令一名女警不幸殉職，令人覺得痛心之餘，走私問題又再次引起香港人關注。响香港境內，除咗香港島、大嶼山以及各個大小離島外，九龍同新界地區三面環海海岸線長，因此香港一直都有走私猖獗呢個問題。講到走私，唔知史友們有無聽過鴉片戰爭前就有人利用香港作為走私之地呢？

响十九世紀，唔少國家同中國都有貿易往來，好似英國咁就有來華做生意。由於當時中國只開放廣州一個貿易港，所以响珠江口嘅香港就成為唔少商船同商人暫待等入廣州嘅地方。响1820年代之後，香港同外國商船關係更形密切，就响個陣大量鴉片輸入中國，影響到民生。後嚟清廷禁煙，禁止載煙船隻進入廣州黃埔港，於是英國運載鴉片嘅走私船以及販賣鴉片嘅躉船就停泊响伶仃島水域以及香港水域一帶，繼續從事鴉片走私貿易。由於廣東沿海每年五月至十月係風季，港島同九龍之間嘅天然海港就成為鴉片船避風之處。另外，滿清水師裝備落後，對住全副武裝嘅走私躉船都無乜辦法。就係咁香港响十九世紀一段長時間成為咗一個走私鴉片嘅熱點喇！

原圖嚟自網絡