史上唯一奪八量級冠軍拳王帕奎奧引退

對唔少鍾意拳擊嘅史友嚟講，尋日都係相當令人驚訝嘅一日，事關果位相當傳奇嘅菲律賓傳奇拳王帕奎奧就喺自己嘅社交平台宣佈，正式引退結束佢長達26年嘅拳擊生涯，今後大家都冇乜機會再睇到佢嘅精彩表現喇！

帕奎奧現年42歲，佢出生喺1978年12月17日布基農省一個農民家庭，之所以會對博擊運動產生興趣，全因為佢受到李小龍、拳王阿里影響，於是喺12歲嘅時候經佢舅舅 Sardo Mejia進行拳擊訓練。佢開始只係喺公園進行訓練，但去到15歲嘅時候就已經被認定係菲律賓南部最強嘅少年拳手，後來仲以60勝4負嘅業餘戰績進入國家隊。

時間去到1995年，佢就正式以職業拳擊手嘅身份展開佢嘅傳奇生涯，身高166厘米嘅佢至今戰績62勝7敗2和，由1998年贏得WBC Flyweight（112磅）世界冠軍開始，先後拎埋Super Bantamweight（122磅）、Featherweight（126磅）、Super featherweight（130磅）等量級冠軍，係史上唯一一個可以拎到八個量級冠軍嘅拳王。