今日係國慶國,要知道中國可以發展到今日絕非一件容易嘅事。以往阿史都同史友們介紹唔少在美華人受到歧視同埋逼害嘅歷史,早年嘅華人受到唔少苦難,有啲仲失去寶貴嘅生命至今都仲未得到平反。近日,曾經作為加州最大華埠之一聖荷西市就一致通過決議,就該市喺「種族主義、仇外心理和歧視」中扮演嘅角色、為昔日嘅排華歷史道歉,係現時美國對當年華裔遭受不平等待遇發表正式道歉嘅最大城市!
喺早年嘅聖何西市其實就係附近農場、果園工作華裔移民嘅生活中心,亦都係繼加利福尼亞州華人人口第二多嘅城市。早年華人嘅勞動力大、工作表現優秀,喺勞動市場競爭力相當大,結果就引嚟唔少白人勞力仇視。去到1879年,加州就通過咗一部法案,授權州政府可以決定邊啲人可以喺加州居住、以及禁止公司、州、縣或市政府僱用華人;唔單止咁,去到1882年美國聯邦政府仲通過埋排華法案,係美國歷史上迄今為止唯一一個針對特定族裔嘅歧視性移民法案。
結果喺兩條法案推出之後,聖何西市其後採取一系列針對華人政策、措施,當地華人唔單止受到嚴重歧視同埋暴力傷害,甚至喺1887年聖何西市發布政令將中國城稱之為「公害」,後來中國城更被蓄意縱火焚毀,1400多人因此流離失所。
時間嚟到百幾年之後,當年受到逼害嘅華人可能都再聽唔到美國人嘅道歉,但就希望可以如發起此次道歉嘅聖何西市議員佩拉雷茲(Raul Peralez)所言,「警醒我們不要讓歷史重演。」
原圖嚟自網絡