喺形容一件事值得不惜一切、賠上生命都去陪伴對方完成,我哋通常都會用到「捨命陪君子」呢個詞嚟形容,之不過大家又有冇諗過到底係邊個歷史人物開始做呢件事先呢?今次阿史就同大家介紹下啦!
相傳喺戰國時期南方楚國廣招賢才,於是當時就有兩個人物,分別叫做左伯桃同埋羊角哀,兩人喺路上相識並且一同前往楚國求見謀仕。之不過喺呢段路途上,佢哋二人行經齊地梁山就不幸遇上大雪天氣,而佢哋所帶嚟嘅衣衫、食物根本唔足夠兩個人捱過呢段路。於是喺被困幾日之後,當時左伯桃就作出咗一個決定,佢為咗成全朋友可以見到楚王,就將自己所有衣物同埋食物都交晒畀羊角哀,然後自己就去咗樹洞自殺。
結果羊角哀成功到達楚國仲被拜為上大夫,而楚王得知左伯桃捨生之舉,亦都深受感動許以上卿之禮厚葬。之不過故事仲未完,後來羊角哀亦都將左伯桃屍骸葬於楚地,但點知左伯桃墓旁正係荊將軍墓,左伯桃報夢畀羊角哀表示荊將軍「以武力迫我為奴,我不從,與之連戰不敵,已瀕絕路。」得知呢個消息後,羊角哀拜楚王道別,並且至左伯桃墓前,舉刀自刎相助。
呢個就係「捨命陪君子」完整嘅故事。後世得知呢個故事後,都將呢對朋友形容為「羊左」,而呢種捨身為朋友嘅深厚情誼就被形容為「捨命陪君子」喇!

原圖嚟自網絡