繼續同史友們介紹抗美援朝嘅經典戰役，呢幾日都同史友們講到《長津湖》呢部電影，電影背後真實嘅歷史就係長津湖戰役，而喺呢場戰鬥中值得一提嘅絕對就有新興里圍殲戰，事關呢次圍殲中國人民志願軍第27軍一部克服咗裝備差距，全殲美軍當時引以為傲嘅軍加強步兵團「北極熊團」。
呢場戰役發生喺抗美援朝戰爭第二次戰役當中、當時中國人民志願軍向長津湖以東地區嘅美軍發起進攻作戰，就戰時裝備嚟講，中國人民志願軍27軍一部就只係得少量小口徑炮同埋60火箭筒，但以美國為首嘅聯合國軍總兵力就達到4100人、各種火炮46門、坦克37輛，軍力軍備上已經係一個極大差距，而且美軍仲有海空軍嘅優勢，中方絕對係喺劣勢上作戰。
喺以美方為首嘅聯合國軍入面，就有美軍軍中王牌「北極熊團」，呢個兵團係以3個步兵營、一個坦克連編成，每日仲會有航空兵2～8架次火力支援，真係唔講得笑。喺1950年底，當時聯合國軍越過三八線發動攻勢，希望可以喺聖誕節前結束韓戰，之不過當呢個「北極熊團」到達長津湖以東新興里，就誤以為志願軍撤退緊，結果就被志願軍第80師將作戰隊包圍，先係令到「北極熊團」兩個步兵營各傷亡百人。
當時領導「北極熊團」嘅麥克萊恩上校決定進攻，仲認為可以一路殺到鴨綠江，兼任聯合國軍參謀長嘅阿爾蒙德將軍仲揚言「不要讓一群中國洗衣工阻止你們」。結果，聯軍嘅第二步兵營(2-31)以及第31團戰車連就被志願軍阻止增援、志願軍成功夜襲，就連麥克萊恩都中槍被俘。
戰事去到尾聲，3191人嘅「北極熊團」就被全殲，王牌團番號「北極熊團」永遠地從美軍戰鬥序列中消失，而第239團3營通訊班長張積慶就機緣巧合將一塊敵人軍旗作為戰利品上繳，現時「北極熊團」團旗就被收藏於中國人民革命軍事博物館內。
原圖嚟自網絡