最近阿史睇到篇報道，話金嗓子個老闆娘江佩珍被限制消費同限制出境，仲話佢已經成為行內著名「老賴」。仲記得當年金嗓子嚟香港上市時佢打鑼個下霸氣英姿，今時今日竟然會咁。
講到金嗓子，除咗大家喉嚨痛會記得呢個牌子之外，可能唔少史友都見到一代巴西球王朗拿度幫金嗓子做代言，但原來朗拿度本身連自己做咗代言人都唔知。話說响2003年，當時朗拿度跟隨皇家馬德里到中國作表現賽，期間江佩珍就以30萬美金力邀大哨出席一場晚宴，响晚宴上大哨表演咗幾下腳法球技，後嚟工作人員仲叫佢著件印有金嗓子嘅球衣，叫佢拎起盒金嗓子對住鏡頭笑，拍低咗段片。當時朗拿度同佢經理以為食餐飯表演下就有錢袋，點知金嗓子就拎咗朗拿度著金嗓子波衫嘅影片加工成為廣告，就係咁朗拿度响無同金嗓子簽約情況下，被成為「廣告代言人」。結果幾年後朗拿度先知自己响中國被成為「代言人」，不過大哨最後都係選擇庭外和解算數。