响啱啱一份出爐嘅《施政報告》當中,推咗個北部都會區規劃,仲打算將北環線向東伸延,形成一個由新界東北至新界西北嘅新界北鐵路。

可能史友們都覺得响新界北區起鐵路係未來嘅規劃,但心水清嘅史友都認識記得新界東北响好耐以前就有沙頭角鐵路,咁大家又知唔知本身沙頭角鐵路原先係新界北鐵路計劃嘅一部分呢?响1898年英國接管咗新界之後,當時政府開始規劃新界地區交通網絡點樣發展。1910年九廣鐵路英段通車後,當時負責管理新界嘅理民府,就建議興建一條鐵路,貫通新界東西嘅小鐵路,呢條鐵路分東西段,東段由粉嶺至沙頭角修建一條窄軌鐵路,亦即係後嚟嘅沙頭角支線,至於西段就係由粉嶺經元朗至青山,即今日嘅屯門,稱為青山支線。不過,呢個青山支線建議就一直只係紙上談兵,加上連接新界各地嘅公路相繼落成,令呢個青山支線計劃不了了之。直到上世紀八十年代,政府响新界西北地區興建輕鐵系統,屯門至元朗一帶先至有鐵路出現。