繼續同史友們介紹我國嘅國家級文物,位於西安嘅秦始皇陵本身就係一個驚世嘅考古發現,而喺當中亦都出土過唔少國家級文物,其中一樣絕對係秦始皇銅車馬。 唔講唔知,今時今日大家雖然可以睇到幾完整嘅銅馬車展示出嚟,但喺呢件文物出土果陣,其實係碎成三千幾塊。

喺1978年果陣,考古人員就喺秦始皇陵封土西側發現到古代馬車嘅配件,而經過兩年時間之後,考古人員就再喺發掘期間搵到兩乘彩繪銅馬車。 雖然話就話係銅馬車,但由於喺地底埋咗2000幾年,馬車外部原有嘅木椁早已腐朽散落,上層填土坍塌亦都令到馬車破碎。

由於碎成咁樣嘅程度,短時間內根本冇辦法可以清理到,於是考古人員就日夜喺發掘現場看守住呢件文物,直到以四個木箱將銅馬車以及底部土層一齊搬到博物館清理為止。 據估計,當時單單係馬車上嘅一個傘葬就已經有成300幾塊碎片,最厚嘅碎片就只有3毫米,而最薄甚至仲去到0.8毫米,真係相當誇張!

而經過一系列由文物保護專家、自然科學專家、機械專家、焊接專家以及鉗工進行嘅鑄造、焊接、鑲嵌、銷接、活铰連結、子母扣連結、轉軸連接等多種工藝之後,歷時八年專家團體先至修復到呢件文物,亦都令世人睇清楚到底古代御用車係駕點樣!

原圖嚟自網絡