以血肉之軀抱炸藥奔向敵人 「爆破大王」楊根思

呢排都同史友們介紹唔少抗美援朝期間發生過嘅故事，尋日就同史友們講完「最大嘅叛徒」，今次就等阿史介紹一下捨身殲滅敵人嘅英烈，佢就係有「爆破大王」之稱嘅楊根思。

楊根思出生喺1922年嘅一個貧苦農民家庭，喺12歲嘅時候失去雙親嘅佢就已經去到上海做童工，喺1944年佢就加入新四軍由班長、排長一直做到連長，屢立戰功。時間去到1950年，佢就參加咗中國人民志願軍去到朝鮮作戰。喺參軍之後冇耐，作為志願軍連長嘅佢就奉命要帶令一個排扼守下碣隅裏外圍1071高地東南小高嶺、切斷美軍南逃退路。

之不過，當時進攻嘅係美軍「王牌」陸戰第1師，對方猛烈嘅炮火令到唔少防禦工事都被破壞，經過幾輪攻守之後，美軍以兩個連嘅戰力以及八部坦克再次進攻，而楊根思就指揮戰友以刺刀、槍托、鐵杴展開拼殺。美軍好快就湧到上山頂，而楊根思就親自率領兩王正面抗擊。被美軍以空中以及地面炮火狂轟濫炸之下，楊根思仍然堅守陣地。但去到第八次進攻之時，陣地之上就只係得返楊根思同兩個傷員，與此同時有四十個美軍準備登頂，當時楊根思就將炸藥抱到身上，縱身沖向敵群，與爬上陣地嘅美軍同歸於盡。