喺形容人與人之間真心誠意、坦誠共事嘅時候，大家都用會到「肝膽相照」呢個詞，之不過到底呢個詞係點樣起源？又係由邊兩位歷史人物開始？今次阿史就同大家講一講啦！

「肝膽相照」呢個詞出自《史記·淮陰侯列傳》：「臣願披腹心，輸肝膽，效愚計，恐足下不能用也」，而當中講呢句說話嘅人係淮陰侯韓信下屬蒯通。要知道韓信係滅秦建漢嘅重要人物，佢以往就曾經受過「胯下之辱」，喺項羽營中又不被重用，最終經過蕭何多次多次引薦先至成為漢營大將軍。

局勢去到後來演變成楚漢相爭，當時韓信就已經被封為齊王，手握大軍。見到咁嘅局勢正常人都唔會擔心，之不過當時韓信嘅謀士蒯通就同韓信諫言，指明韓信已經功高蓋主，當天下一旦平定，韓信就必定有殺生之禍。為咗令韓信相信自己赤誠之心，蒯通就表示「臣願披腹心，輸肝膽，效愚計，恐足下不能用也」，希望咁樣可以令到韓信保持中立。

之不過韓信就覺得自己有唔少功勞，劉邦亦都唔敢對付佢，所以就拒絕蒯通嘅提議。後來定楚軍戰敗之後，韓信就先係被削去兵權，再被貶為淮陰侯，死於呂后之手。後世就將「披腹心，輸肝膽」演化成「肝膽相照」嚟形容韓信、蒯通之間嘅關係。

原圖嚟自網絡