之前都提及過阿史又玩返暗榮廿年前嘅大作《成吉思汗IV》，唔知史友們仲記唔得响其中有一章就係朱棣同帖木兒嗰個年代，用帖木兒開局都真係幾好玩。講開帖木兒，記得中史老師以前响堂上師「踩過界」講埋世史，講咗一個相關嘅傳說，到今日阿史都仲記得。

帖木兒係十四世紀時帖木兒汗國嘅創始人，帖木兒汗國係十四世紀一個強大嘅帝國，而帖木兒本身先後打敗多個國家嘅軍隊，好似打敗過花剌子模、東察合台汗國、西波斯、金帳汗國，連當時不斷打到歐洲各國有氣無碇抖嘅鄂圖曼帝國都俾佢打敗過。而佢响1404年，率領20萬大軍準備進攻明朝，不過响途中(1405年)病死咗。

帖木兒軍隊响東征西討過程中，軍隊往往响打勝仗後好多時都採取搶光殺光政策，所以唔少地方嘅人對帖木兒都相當恐懼，即使帖木兒死後都係咁，所以就慢慢出現咗一個傳說：就係帖木兒嘅遺骸被移動，就會出現戰爭，呢個就係「帖木兒詛咒」。真係唔知係咪咁啱得咁橋，歷史上真係出現過帖木兒遺骸被移動出現嘅戰爭，最出名就係1941年嘅蘇德戰爭。响1941年6月，蘇聯學者米哈伊爾·格拉西莫夫得到斯大林批准，開啟咗响撒馬爾罕嘅帖木兒汗墓，點知墓穴打開咗無幾耐，納粹德國就揮軍入侵蘇聯，蘇聯响未做好準備之下節節敗退。所以有人就話斯大林移動咗帖木兒嘅遺骸，結果中咗帖木兒詛咒，蘇聯被捲入戰爭當中。

至於帖木兒詛咒係真定假，史友們自己諗喇！