阿史之前介紹咗有講法話劉備為兒子改名顯露咗野心，今次阿史就想介紹下劉備對頭人曹操嘅仔。講到曹操之子，可能史友們第一時間係會諗到曹不同曹植，諗多啲可能會諗到神童曹沖，其實曹操仲有一個好打得嘅仔，叫曹彰。
據《三國志‧魏書》所載，曹操有廿五個仔，卞皇后生文皇帝（即曹丕）、任城威王彰、陳思王植、蕭懷王熊。曹彰少善射御，臂力過人，自小就立志為將。後嚟代郡烏丸造反，曹彰被任命為北中郎將，平定亂事立下戰功，曹操開心扯住曹彰啲髮叫佢做「黃鬚兒」。
而後世對曹彰最為熟悉嘅，就係佢質疑佢阿哥曹丕繼位一事。據《魏略》所載，建安二十五年曹操响洛陽死咗，曹彰就馬上搵曹植話「先王召我者，欲立汝也。」即係話曹操生前同佢講過係想立曹植而唔係曹丕。不過曹植就無做任何嘢，仲話佢哋唔會好似袁紹啲仔咁爭位。後嚟仲去想質問曹操嘅印璽响邊，不過就被賈逵回絕咗。
曹丕即位後，雖然立咗兩位兄弟做諸侯，但就無得到重用，《魏氏春秋》甚至記載話曹彰想質問曹丕玉璽响邊度而令曹丕覺得佢有叛離之心。至於曹彰點死，有一個講法就話曹丕唔見佢令佢忿怒暴薨。咁睇嚟曹丕都真係無乜兄弟緣。