最近阿史睇咗個視頻,內容係關於蒙古同南宋聯合消滅金國嘅歷史。响中學中史課程中對金國滅亡嘅描述著筆不多,但睇返其實都相當血淋淋。
金國係一個由女真族於十二世紀建立嘅皇朝,由開國君主滅亡君主完顏阿骨打至金哀宗國祚一百多年。响金哀宗完顏守緒當上皇帝嘅十幾年間,對抗國力強大嘅蒙古成為金國存亡嘅關鍵。可惜嘅係,蒙古响公元1227年滅西夏後,金國成為蒙古下一目標。其實金哀宗係一個勤政愛民嘅君主,可惜面對住蒙古大軍進攻亦無法抵抗,首都汴京被攻陷,金哀宗逃往蔡州。响1233年,蒙古與南宋達成聯軍滅金嘅協議,面對蒙宋聯軍金國,蔡州被困三個月,彈盡糧絕。金哀宗就响最後時刻將帝位傳俾將領完顏承麟,但完顏承麟即位都無一日就戰死,金哀宗亦自縊而死。
金哀宗死後,屍體就俾人分屍。根據《宋史‧孟珙傳》所載:「珙與倴盞分守緒骨」,守緒即係完顏守緒,亦即係金哀宗,倴盞就係蒙將塔察兒。即係話,金哀宗遺骸被宋將孟珙同蒙將塔察兒所分,成為戰利品。