之前阿史介紹金國滅亡前關鍵戰役三峰山之役中,提及過陣中大將完顏陳和尚都犧牲咗,而呢位完顏陳和尚就被譽為金國最後大將。
完顏陳和尚本名係完顏彝,陳和尚係佢嘅小字。據《金史》所載:「陳和尚天資高明,雅好文史,自居禁衛日,人以秀才目之。」二十歲時被蒙古人所俘,後嚟逃回金國從軍。佢從軍後任紫微軍都統、忠孝軍提控等職,由於佢治軍有方,忠孝軍紀律嚴明,成為金國其中一支戰力最強嘅軍隊。完顏陳和尚最出名嘅戰績就係以四百騎於大昌原之役擊敗八千蒙古軍,又曾經擊敗蒙古漢將史天澤以及「四狗」之一嘅速不臺,屢破蒙古嘅佢絕對係金國末期嘅重要戰將。
只可惜,三峰山之役金國軍隊被蒙古大軍擊敗,完顏陳和尚親自到敵軍軍營領死,蒙古大將本來想迫他投降,仲對佢用刑,結果佢「斫足脛折不為屈,豁口吻至耳,噀血而呼,至死不絕。」單係睇字,都覺得完顏陳和尚係真漢子。