1941年美國時間12月7日,日軍偷襲美國响夏威夷珍珠港嘅軍事基地,成為第二次世界大戰中其中一件重要事件,今日就係呢次事件嘅80周年紀念。
喺1941年12月7號,即係80年前今日,日本出動超過300架戰機偷襲位於美國夏威夷珍珠港嘅太平洋艦隊基地,美軍超過2000人陣亡,十幾艘艦隻被擊沉。呢次日本突襲令美國正式向日本宣戰,太平洋戰爭就此爆發。亦由於納粹德國同意大利同時向美國宣戰,令歐亞戰場合流,呢個亦係歐洲同亞洲戰場戰事嘅一個轉捩點。
至於點解日本會偷襲珍珠港呢?响1941年8月,美國對日本實施石油禁運同經濟制裁。由於日本嘅石油同鋼鐵好多都係從美國入口,所以美國嘅制裁對日本嘅軍事計劃帶嚟沉重大打擊,亦導致咗日本採取南進政策。將目標放响歐美等國响亞洲嘅殖民地。而侵略呢啲地方好大機會會引嚟美國海軍嘅攻擊,亦因為咁就計劃偷襲珍珠港呢個美國响太平洋重要嘅軍事基地,令日本嘅南進計劃得以順利進行。
原圖:takungpao