今日係12月8日，响80年前日軍入侵香港，為期十八日嘅香港保衛戰正式開始，响同年12月25日港督楊慕琦投降，香港淪陷，開始咗三年零八個月嘅黑暗淪陷歲月。
早前阿史睇咗歷史學者劉蜀永一篇關於二戰時香港抵抗日軍嘅文章，有個講法都想同史友們分享下，劉教授响文中提出咗「英軍十八天的抵抗和港九大隊三年零八個月的抗戰性質是否相同」呢個討論議題。簡單歸納而言，劉教授响文中提出咗當時英國守衛香港目的有兩個：「一是減輕英國在新加坡的壓力，二是為了大英帝國的面子。」例如响香港淪陷前英國軍方對蔣介石响1941年5月提出派兵協防香港同緬甸呢個建議有所保留，陸軍總參謀長迪約翰更表示過英國政府既定政策係「防止與日作戰」。所以同中國方面協商，必須以英方遠東戰爭計劃為依歸，而非中國方面嘅短期戰術目標。
至於响香港淪陷三年零八個月期間活躍嘅抗日游擊隊港九大隊，劉教授响文中出佢哋作戰目的十分明確，就係衛國保家，劉教授引用咗1945年9月港九大隊响《撤退港九新界宣言》嘅一段內容道：「回溯我隊在港九淪陷後成立，我們的目的就是打倒日本侵略者。三年又八個月，我們在中國共產黨領導下，冒出生入死之險，不惜重大犧牲，救護盟邦人士，肅清土匪活動，破壞敵偽統治，保衛人民利益，確實盡了我們應有的努力，並做出了許多成績。」
劉教授通過呢篇文章得出一個結論：「二戰期間在香港的確存在兩種不同的抵抗。英軍十八天的抵抗和港九大隊的抗戰是性質完全不同的兩回事。」
以上內容係參考同引用劉蜀永教授响《紫荊論壇》（2021年11-12月號）〈二戰期間香港兩種不同性質抵抗的探討〉一文內容，史友們不妨睇下全文睇下會唔會其他睇法。
原圖嚟自網絡