1936年12月12日張學良同楊虎城進行「兵諫」軟禁蔣介石，迫佢「停止內戰，共同抗日」。軟禁當時國民政府最高領導人蔣介石絕對係大到不得了嘅事，震驚中外。咁當時南京國民政府方面又有乜反應呢？
响西安事變發生當日，南京方面已接到電報話西安出咗大事，中國國民黨中央執行委員會常務委員會就召開會議，會議決議褫奪張學良本兼各職，交軍事委員會嚴辦，所部軍隊歸軍事委員會直接指揮。另外又通過〈軍事政治之穩定案〉，行政院由副院長孔祥熙負責，軍事委員會加推何應欽等為常務委員，掌指揮調動軍隊大權。
另一方面，宋美齡就搵咗曾經係張學良私人顧問、當時係蔣介石私人顧問嘅澳洲籍人士端納去西安了解事件，後嚟得知蔣介石安全無事，而張學良轉達想孔祥熙到西安進行談判，但孔祥熙因健康同公務問題，於是改由宋子文到西安。其實當時南京政府就點樣對付張學良出現咗兩派唔同意見，即出兵討代張學良同通過談判和平解決。不過掌權個批人同蔣介石關係太密切，所以最後張學良願意和平解決事件，所以西安事變就向著和平方向解決。
不過西安事變解決過程並唔係咁一帆風順，篇幅太長，下回分解。
原圖嚟自網絡