幾日前係澳門回歸紀念日,咁啱阿史又介紹咗香港回歸時擔任升旗手朱濤嘅故事,其實澳門回歸同朱濤都有一個小故事。
1997年7月1日香港回歸祖國後,下一個舉世矚目嘅大事就係1999年澳門回歸。由於朱濤擔任過香港回歸儀式中嘅升旗手,後嚟佢亦再獲任為澳門回歸典禮嘅升旗手。再被委以重任嘅佢,又開始練習升旗。响1999年12月13日,佢去到澳門準備,當佢去到回歸儀式場館時就進行實地練習。點知佢升旗速度同國歌演奏時間唔多啱,由於佢練習練咗幾千次以上,有晒肌肉記憶,所以佢就覺得咁樣出錯好奇怪。情急之下佢就搵到旗桿設計師,設計師就話佢哋都係啱啱將旗桿豎起,仲未調整好高度,所以旗桿高度唔標準。朱濤知道出錯原因後,佢先鬆一口氣。當然!最後响澳門回歸儀式中朱濤準確無誤咁將五星紅旗升到旗桿頂部。
原圖嚟自網絡