之前介紹過响香港淪陷時期,日本軍政府就响兵頭花園興建一個「香港神社」,其實當時日本軍政府仲响香港起過兩個「神社」。

其中一個叫做「南海神社」,位置就响昔日金鐘嘅域多利兵房。响日軍佔領香港時,個度係第二遣支艦隊司令部,佢哋就响個度起咗「神社」,「供奉」陣亡日軍士兵。而响「神社」附近就有個鳥居同一個刻有「南海神社」嘅石碑。

奇怪嘅係,响戰後英軍重駐兵營,就無拆到個鳥居同石碑,直至七十年代末八十年代初,鳥居同石碑先响香港消失,其中個塊石碑就運咗去日本放响「靖國神社」。

原圖:日本侵華圖志