早排阿史就同史友們介紹咗唔少喺南京大屠殺期間發生過嘅慘痛歷史，而喺慘劇發生之時，除咗有我國嘅英雄挺身而出之外，亦都有唔少外國友人伸出援手，其中一位正係被當時難民稱之為「活菩薩」嘅明妮·魏特琳。
明妮·魏特琳出生喺美國伊利諾州塞科爾，佢係以美國基督會在華傳教士嘅身份去到中國，轉輾之下去到南京擔任金陵女子大學教育系主任。而當南京被日軍攻陷，金陵女子文理學院大部分職員已經去到成都之時，魏特琳仍然組成留守委員會，擔任代理院長。
喺大屠殺發生期間，佢積極營救中國難民，以金陵女子文理學院保護咗成千上萬嘅中國婦孺難民。佢亦都以日記嘅形式紀錄咗當時日本占領下南京嘅情形，成為日後有力嘅證據指證日軍點樣進行大屠殺。而亦都可能因為見證咗呢件慘劇，無力感令到佢精神失常，後來喺1941年喺美國嘅寓所佢以煤氣自殺。當時魏特琳嘅義舉為人所讚譽，甚至後來喺佢墓碑上仲刻有「永生金陵」嘅文字，南京市至今仲有保留佢嘅塑像。
原圖嚟自網絡