近排都同史友們介紹唔少三星埋出土嘅文物，呢個被稱為係「外星人文明」嘅遺址，一直都出土唔少驚世嘅文物，除咗有之前嘅青銅神樹之外，「青銅大立人」亦都係當中數一數二嘅國寶級文物。如果史友們有親眼見過呢件文物，應該腦海中都會有一個問題，就係到底呢個「立人」原本手中係拎住啲咩？阿史今次就同大家講一講啦！

三星堆被稱為係「20世紀人類最重大考古發現之一」，而呢尊喺1986年出土嘅「青銅大立人」，銅像連同底座高達2.62米，銅像中空，重約180公斤。出土之時銅像係被斷為兩截，背部斷裂變形，經過修復先至可以成功展出。由於「青銅大立人」係同時期全世界最大嘅一座青銅立人像，所以亦都好快被列為「禁止出國參展」嘅國寶級文物。「青銅大立人」雙手係呈虛握狀，睇落本身就好似拎住啲野咁，咁到底原本可能拎住啲咩呢？

近排就有多名學者上到一個央視進行爭論，四川省文物考古研究院三星堆遺址工作站站長、三星堆博物館館長雷雨表示，銅像嘅雙手中空並唔係同一條直線上，所以好有可能係拎住象牙；而四川省文物考古研究院原副院長、研究員陳顯丹就認為，銅像嘅手勢可能只係祭祀手勢，本身並冇任何物件；而中國社會科學院歷史學部主任、中國考古學會理事長王巍就認為應該係有一隻立鳥畀佢手持，唔知史友們又點睇呢？

原圖嚟自網絡