首位黑人奧斯卡影帝薛尼波特逝世 享年94歲

首位奪得奧斯卡最佳男主角獎嘅美國著名黑人影星薛尼波特（Sidney Poitier）日前就喺洛杉磯住所逝世，享年94歲。

呢位傳奇人物生於美國邁阿密，喺巴哈馬成長。喺上世紀四十年代，佢就投身咗演藝事業，期間就拍攝過超過50部電影。唔單止咁，佢仲憑住自己出色嘅表現打破當時相當嚴重嘅荷里活種族障礙，喺1958年憑住「逃獄驚魂」首次獲得奧斯卡提名。雖然呢次佢並冇獲獎，但喺1964年佢成功憑住《原野遊龍》奪得奧斯卡最佳男主角獎，係首名奪得奧斯卡影帝嘅黑人演員。

而講到佢最廣為人知嘅電影，絕對就係《桃李滿門》（To Sir With Love），呢部電影講述一位黑人教師應聘到一所劣名昭彰嘅中學，面對一班無心向學嘅頑劣學生，佢點樣春風化雨將佢地帶返正軌。而喺晚年，薛尼波特獲奧斯卡終身成就獎，並且喺2009年獲時任美國總統奧巴馬頒發總統自由獎章，紀念佢一生重要嘅貢獻。