話說早兩日行佐敦某間國貨公司，响賣嘢食個位見到盒裝竹蔗茅根精，即係啲回憶都返晒嚟！記得細個個陣好鍾意沖竹蔗茅根精開水飲，沖個下好玩，飲個下又甜，不過大左之後就真係好少再飲，因為好似唔係成日見到有得賣。

竹蔗茅根精係唔少香港人清熱養生嘅飲料，亦可以話係其中一款深受香港人愛戴嘅國貨，咁史友們又知唔知竹蔗茅根精係幾時出現呢？據資料顯示，竹蔗茅根精係响上世紀六十年代出現，當時廣東揭陽市普寧市洪陽鎮一間果子廠，成功研製出竹蔗茅根水嘅原材料混合濃縮成結晶體，後嚟當地出現專門生產呢款竹蔗茅根精嘅工廠。由於竹蔗茅根精儲存同飲用方便，因而大受歡迎，更加解決普寧市竹蔗積壓嘅問題。呢款產品之後更因符合國家規定標準獲列為優質出口固體飲料，暢銷海外。

依家睇返，原來竹蔗茅根精係好嘢嚟！