繼續同史友們介紹我國嘅傳奇人物,中國喺近代嘅科研之所以可以高速嘅發展,其中一個原因其實係有賴一班愛國嘅科學家。錢學森、鄧稼先、楊振寧呢啲傳奇人物就同大家介紹過唔少,今次阿史就想講一講中國克隆之父童第周。
童第周出生喺1902年浙江嘅一個農民家庭,家境清貧年幼喪父嘅佢由兄長養大,但天資聰穎以17歲之齡以插班生嘅身份加入寧波效實中學就讀,並且後來仲去到上海復旦大學獲心理學學位。時間去到1927年,喺中央大學生物系主任蔡堡推薦下,童第周就入到國立中央大學生物系擔任蔡翹教授助教,後來又喺1930年赴比利時留學,喺布魯塞爾自由大學布拉舍(A. Brachet)實驗室開始胚胎學研究工作。
童第周早期嘅研究係在於卵子受精面與對稱面關係,喺早期研究當中佢就先係完成咗海鞘早期發育嘅研究,獲得埋博士學位。但隨後抗日戰爭爆發,佢就選擇喺1934年底回國去到山東大學擔任生物系教授。
喺1948年,童第周就應美國洛氏基金會邀請到美國耶魯大學任客座研究員,本來佢係可以一直喺美國以較高嘅生活條件進行研究工作,甚至美國耶魯大學提出用高薪誘惑童第周前往美國任教。但呢位完成咗「細胞核移植研究」、「兩棲動物卵子發育能力研究」嘅科學家深知自己係中國人,亦都希望可以為祖國貢獻自己力量,所以最終決定喺新中國成立之後繼續擔任了中國科學院實驗生物研究所副所長、山東大學副校長、中國科學院海洋生物研究所所長等等,佢就係中國克隆之父童第周!
原圖嚟自網絡