王老吉涼茶廣州香港有兩派？

尋日介紹咗知名沖劑竹蔗茅根精嘅由來，今日就要介紹一款廣東人都會知嘅王老吉涼茶。咁史友們又知唔知，依家香港王老吉涼茶同响廣州飲到嘅王老吉涼茶，係有唔同嘅呢？

王老吉係廣東鶴山人王澤邦响十九世紀所創，由於佢乳名叫阿吉，後嚟佢得到一道藥方，於是依方煮茶為百姓治病。而佢响咸豐年就被冊封為太醫令，之後仲响廣州開咗「王老吉涼茶」，後嚟分店愈開愈多，仲用紙袋包裝涼茶料出售。响王澤邦死後，王老吉業務就由三個仔管理，後嚟三家人就分別响廣州、澳門同香港發展，而王老吉涼茶就亦令王老吉成為馳名省港澳嘅涼茶名牌。

响新中國成立後，响廣州嘅王老吉涼茶就歸入國有企業，經過整合後就成為王老吉聯合製藥廠，再响六十年代改名為廣州中藥製藥總廠，即係依家廣藥集團嘅前身。另一方面，王老吉個仔王貴發响十九世紀末就去咗香港發展，响香港開設咗涼茶舖，亦係王澤邦後人主理嘅王老吉涼茶一支。有趣嘅係，多年後東莞商人陳鴻道向香港王老吉傳人王健儀取得秘方使用權同响內地發展品牌，後嚟慢慢就演變為廣藥子公司同加多寶打多年官司喇！