最近天氣清涼,阿史好多朋友都去行山打卡,近期就有幾個朋友不約而同去咗屯門一個水塘行山打卡,個度就係藍地水塘。

藍地水塘位於香港屯門虎地,又名老虎坑水塘,於1960年啟用,現時水塘所儲嘅水係唔用作食用水供應,而係用於灌溉。而呢個水塘除咗以風景宜人聞名外,屯門一帶居民對佢認識可能嚟自各種古怪傳聞。其中一個傳聞就話呢個水塘好猛鬼,因為好多人响呢個水塘游水都出事,過去廿年就至少發生六宗小童遇溺而死嘅意外,所以就有人話水塘有「鬼抆腳」。另一個傳聞就仲誇張,就話水塘有一條鯉魚精,只要有人响水塘游水都會被佢抆落水,真係聽到都有啲驚。

傳聞歸傳聞,水塘本身唔係適合游水嘅地方,水務署亦有警示牌叫人唔好落水,所以史友們去到望下風景好喇。