嘩嘩嘩,真係大吉利是,就到新年竟然用呢啲方式「賀年」,真係估佢唔到!
就咁睇兩幅圖,眼利嘅史友可能都已經發現到係咩問題,冇錯喇,就係呢兩道賀年菜式竟然同場出現吉儀金銀衣紙。留意返,呢件事其實唔係一件惡作劇,而係英國兩家主流媒體BBC同埋《衛報》刊登嘅中式賀年食譜。《衛報》嘅食譜當中,就刊登咗多款賀年食品,其中喺「豬肉蟹肉餃子」食譜配圖當中,就出現金銀衣紙以及幾個銅錢,而BBC食譜就有利是封以及吉儀。
而東窗事發之後,BBC就已經將相片下架,至於負責影金銀衣紙照片嘅果位英國著名食物攝影師Jean Cazals就表示,自己之所以咁影係想表現「中國風」,但點知喺一知半解之下犯錯。對於呢種另類「賀年」,唔知史友們又點睇呢?
原圖嚟自網絡