現代嘅經濟同科技相當發達，喺資源同埋技術充足嘅情況下，其實科學家比以前相當容易進行各類研發，但喺國家困難時期，我哋先輩又係面對住咩困境呢？阿史今次就同大家講一講「中國核潛艇之父」彭士祿啦！
彭士祿出生喺1925年嘅廣東，童年時佢父母就不幸被國民政府殺害，而佢為咗逃避搜捕就被紅軍戰士家庭收養保護，但後來都係不幸被捉入監獄，獲釋後甚至仲淪落為乞丐，身世相當可能。時間去到1939年，當時十幾歲嘅彭士祿就經救助去到香港生活，再喺香港出發加入東江縱隊參加抗日。
喺新中國成立之後，彭士祿入讀哈爾濱工業大學，更以 26歲之齡獲派到蘇聯學習化工機械。隨住美國核動力潛艇「鸚鵡螺號」下水，中國亦都認識到戰略核潛艇嘅重要性，於是1956年，時任解放軍副總參謀長陳賡大將訪問蘇聯就將彭士祿叫到大使館，希望佢可以改學核動力專業。
學成歸國嘅彭士祿喺1958年開始就隱姓埋名投入核動力核潛艇研發，但當時中國唔單止科學同工業基礎薄弱，甚至仲遇上困難時期，工作人員連飯都冇得食。面對住咁樣困境，彭士祿就帶領團隊挖野菜、白菜根食，冇電腦就用手搖計算機、打算盤。
終於，喺彭士祿團隊刻苦攻關下，中國第一艘核潛艇「091型」喺1970年建成下水。

原圖嚟自網絡