繼續同史友們介紹我國最新嘅考古發現,繼早前喺釣魚城遺址考古當中搵到軍事、政治設施後,近排重慶市文物考古研究所就表示,喺2021年度嘅考古工作當中,就第一次搵到宗教以及生產生活設施,今次阿史就帶大家睇一睇啦!

要知道釣魚城其實係迄今中國保存最完好古戰場遺址,呢個位於重慶合川區嘉陵江、涪江、渠江三江交匯處,占地2.5平方公里嘅遺址,據史料記載係曾經頑強抗擊過蒙古大汗蒙哥軍隊,更加令到蒙古大軍不能越雷池半步。釣魚城保衛戰時長達36年,完美展示咗點樣以弱勝強。以往考古團隊就喺呢個地方搵到唔少軍事、政治設施,見證住呢個「山、水、城」一體多重防禦體系係點樣作為中國古代軍事要塞、戰區築城防禦體系嘅典範。

而經過2021年度嘅考古工作後,考古團隊就清理出房址、道路、高台等遺跡36處,出土各類遺物300餘件,當中更加發現到唔少高台、水井、井台、水池等遺跡;而喺大草房文物點,就搵到大量琉璃構件、一枚銅印章等,證實係嚟自一個佛教轉輪藏經殿,兩項發現都為釣魚城宗教及生產生活設施提供重要嘅實物證據。

原圖嚟自網絡