近期香港新冠疫情大爆發,葵涌邨更成為重災區,。

今次爆發疫區嘅葵涌邨,其實係一條重建嘅公共屋邨,重建前嘅葵涌邨可以話係昔日荃葵青一帶出晒名嘅公共屋邨。葵涌荃灣一帶係戰後香港最早發展嘅衛星城市,而個區第一條公屋邨大窩口邨就响1961年落成,之後荃灣福來邨响1963年落成,葵涌邨就响1964年陸續落成。當時葵涌邨一共有42座住宅大廈(分上下邨)以及4座工廠大廈,住宅都係七層高嘅徙置大廈,係相當早期嘅公屋樓宇型號,而早期居民係以長沙灣艇戶同漁民為主。

講到昔日葵涌邨,最令人記得有一樣嘢,就係治安問題,童黨、黑社會、毒品等問題都出晒名,三十幾年前港台鏗鏘集就去葵涌邨做過訪問,有黑幫份子响節目度講解邨內勢力分佈,仲話行咗入其他勢力範圍就會打架事。阿史就識一位葵涌邨長大嘅中學教師,佢就話雖然治安唔好但又無外界講到咁嚴重,普通居民基本上都可以好平安咁生活。

到咗九十年代,葵涌邨開始進行清拆同重建,2008年完成重建後,成為全港居住人口最多嘅公共屋邨之一。

原圖:huluhk.org