美、英、蘇首腦召開雅爾達會議 確立二戰後世界新秩序

今日係大年初四，同時都係2月4日，喺歷史上嘅今日其實係相當重要嘅一日，事關二戰過後嘅世界新秩序就係喺當年今日確立。

呢場產生「雅爾達密約」嘅會議係喺1945年2月4日喺蘇聯克里米亞雅爾達里瓦幾亞宮當中舉行，出席會議嘅人就有美國總統羅斯福、英國首相邱吉爾同埋蘇聯人民委員會主席史太林。咁可能有史友們問，明明當時二戰都仲未結束，點解三個國家嘅領袖仲咁心急開會？

原因其實好簡單，其實隨住1944年6月1開軍登陸諾曼第展開大規模反攻之後，當時德國就已經冇力回天。至於東南亞方面，雖然美軍成功以跳島戰術壓抑到日本，但當時日本佔領咗中國大片土地，對全球安全而言仲係重大威脅，所以其實多方都希望蘇聯可以盡快對日軍發起進攻。