早幾日就係《感動中國2021年度人物頒獎盛典》,呢個被稱為「中國人精神史詩」嘅盛典當中,就有一位有92歲高齡嘅老人家作為年度人物之一站喺臺上,佢就係顧誦芬院士喇!

出生喺1930年嘅佢,由父親取名自晉代陸機《文賦》「詠世德之駿烈,誦先人之清芬」,就咁聽個名就已經知道父親對佢嘅期望絕對唔簡單。事實上,顧氏家族亦都係一個書學世家,佢父親顧廷龍更加係國學大家、書法大家,所以對顧誦芬自然就係悉心培養。咁點解顧誦芬會成為「殲-8戰機之父」呢?

原來喺1937年7月果陣,佢親眼見到日軍飛機轟炸北平城,佢甚至事隔多年仲記得日軍嘅轟炸機以及投下嘅炸彈。喺呢個戰火紛亂嘅時代,佢就立志要為祖國設計飛機。喺父親支持下,年少嘅佢就自由咁對理工、航空科目進行探究。1947年,顧誦芬從上海南洋模範中學畢業,憑實力一次過拎到浙江大學、清華大學、上海交通大學航空學專業錄取名額。

最終,顧誦芬選擇咗上海交通大學航空系,畢業後就去到航空工業局展開新中國嘅航空工業,初期係負責修理蘇聯支援嘅各型飛機,後來就逐步學習飛機製造,最終同佢嘅同伴喺1956年10月開始設計殲教1飛機。佢講到佢最強嘅代表作,自然就係喺1964年起以5年時間自行設計一款2倍音速、能飛上2萬米高空嘅殲擊機,亦即係後來嘅殲-8。為咗成功設計出呢款機,顧誦芬仲冒險做過唔少事,阿史下回就再大家分解!

原圖嚟自網絡