自古以嚟，維持糧食嘅供應對每個國家嚟講都係一大難題，現代我哋有袁隆平培養出雜交水稻解決幾十億人嘅饑餓問題，咁古人以往又作出過咩努力呢？阿史今次就想同大家介紹下中國甘薯之父陳振龍。

如果史友們有印象，應該都會記得阿史曾經講過其實明朝係處於「小冰河時期」嘅中期，呢個時間氣候反常，有唔少天災出現令到糧食供應大受影響，繼續引發普通民眾動亂。而喺當時，其實有一位在外嘅福建華商不忍人民受苦，甚至不顧自身安危喺海外偷運「一條籐」，間接救咗唔少人。

阿史所講嘅呢位人物就係陳振龍，佢係明代福建長樂縣人，年少時曾經中過秀才，但後來因為屢試不第所以選擇從商，主要就係往返呂宋島。而作為華夏子民，佢眼見國內嘅人民飽受饑荒之苦，而喺呂宋就朱薯遍野。呢種薯耐旱、高產、適應性強，當時佢就覺得可以解決到饑荒問題。於是，陳振龍就自行出資購買薯種，喺明萬曆二十一年(1593年)五月，密攜薯藤避過出境檢查，經過七日七夜航行回到福州，喺住宅附近紗帽池邊隙地試種。

同年，閩中大旱五穀少收，陳振龍就決定上書申報呂宋朱薯可以救荒，結果好快就試種成功。閩人為咗感激陳振龍以及福建巡撫金學曾引進薯種以及推廣種植，先係將朱薯改稱金薯，而且仲建立報功祠紀念。

原圖嚟自網絡