尋日就同史友們講到「國父」孫中山先生嘅生平故事以及佢逝世前嘅一啲經歷。之不過，喺1925年2月，隨係孫中山嘅病情加劇，隨即就佢就通知咗孫科、宋子文、孔祥熙等人北上赴京議事。當時眾人都以為孫中山會立一份遺囑並且指定未來接班人。

當時北上探望嘅眾人當中，就以汪精衛文筆最好，甚至仲被推舉去為孫中山撰寫遺囑。而為咗令到呢件事可以盡快落實，其實汪精衛就已經召集中央人物商定喺事前起過一份草稿：「余致力國民革命，凡四十年，其目的在求中國之自由平等。積四十年之經驗，深知欲達到此目的，必須喚起民眾及聯合世界上以平等待我之民族，共同奮鬥。現在革命尚未成功，凡我同志，務須依照余所著《建國方略》、《建國大綱》、《三民主義》及《第一次全國代表大會宣言》，繼續努力，以求貫徹。最近主張開國民會議及廢除不平等條約，尤須於最短期間，促其實現。是所至囑！」

而孫中山喺聽完之後，既冇修正書稿，亦都冇畀建議，反而係表示好贊成，但就係冇簽字。直到三月十一日，孫中山逝世前一天，醫生就通知汪精衛盡速帶來遺囑簽字，喺眾人見證之下，呢份遺囑就正式落實。

咁可能史友們會問，咁即係邊個係接班人呢？其實呢度並冇一個明確答案，但唔少史學家就認為。喺臨終前其實孫中山一直都好擔心廣州政府將來會被軍閥魁儡化，汪精衛雖然係太過於文人，但孫中山仍然係好相信汪精衛，喺北上前赴談判嘅時候，佢並未邀請廖仲愷、蔣介石，反而係畀汪精衛一路陪同，甚至仲要佢代擬家事遺囑，所以就咁睇嚟汪精衛可能先係佢屬意嘅繼承者。

原圖嚟自網絡