响上星期政府未封沙灘前,阿史就去港島南區嘅深水灣,行到去淺水灣,响麗海堤岸路行行下個陣,有位途人阿姐就話路邊有舊破舊石建築,唔知係乜,阿史影咗相返去再查一查,原來係一個戰時遺跡。

呢個石建築係二戰前嘅PB 16機槍堡。响上世紀三十年代末四十年代初,即日本入侵香港前,香港嘅英國守軍視港島南區為其中一個防守點。為咗抵禦日軍,就响南區起咗唔少海岸機槍堡,圖中兩個就係現時尚存嘅機槍堡遺跡,分別係PB 16機槍堡(响麗海堤岸路)以及PB 17機槍堡(响淺水灣海灘)。

記得十幾年前行呢段路個都無留意到有PB 16機槍堡,今次見到好大程度係因為路邊啲老樹被移除咗,機槍堡就「出現」返。